តិចនិកអប់រំកូនប្រុស! ប៉ាម៉ាក់ ត្រូវធ្វើតាម4ចំណុចនេះ

តើត្រូវអប់រំបែបណាដើម្បីឲ្យកូនប្រុសអាចទទួលយកបាន? ឆ្លើយតបនឹងសំណួរនេះ វេបសាយ បានរកឃើញគន្លឹះចំនួន ៤ចំណុច ដើម្បីអប់រំកូនប្រុសឲ្យស្ដាប់បាន ក្នុងមានដូចខាងក្រោមនេះ៖

1# អ្នកមិនគួរប្រើចរិតរឹងដើម្បីអប់រំគេទេ ដោយគួរតែចេះស្ដាប់គេខ្លះ មិនបង្ខំគេខ្លាំង ទើបមិនធ្វើឲ្យប៉ះពាល់ដល់ផ្លូវចិត្តគេ ថែមទាំងអាចធ្វើឲ្យកូនអាចក្លាយជាក្មេង ដែលចេះស្ដាប់ហេតុផល ដោយអាចធ្វើឲ្យអនាគតគេអាចភ្លឺស្វាងបាន។

2# អ្នកគួរតែធ្វើជាគំរូល្អដល់កូន ដោយមិនគួរធ្វើជាគំរូអាក្រក់ឡើយ ព្រោះកូនរៀនពីអ្នកលឿនណាស់។ ដូចនេះ មិនថាក្នុងស្ថានភាពណាទេ អ្នកគួរតែរក្សាគំរូល្អនេះ ទើបអាចបង្រៀន និងអប់រំកូនឲ្យក្លាយជាក្មេងដែលមានចរិតល្អ។

3# អ្នកមិនគួរជួយកូនគ្រប់រឿងនោះទេ ដោយយូរៗ ទើបអាចជួយគេម្តង ព្រោះបើអ្នកតែងតែជួយកូន នោះនឹងអាចធ្វើឲ្យគេខូចបាន ដោយតែងពឹងលើអ្នកជានិច្ច។ ជាហេតុដែលធ្វើឲ្យកូនមិនចេះធ្វើដោយខ្លួនឯងនោះទេ ព្រោះមានអ្នកជួយជានិច្ច។

4# អ្នកដឹងថាពេលដែលបុរសមានលុយលើខ្លួនច្រើន នឹងធ្វើឲ្យខូចបាន។ ដូចនេះ អ្នកមិនគួរទម្លាប់ឲ្យកូនចាយលុយធំឡើយ ព្រោះអាចបំផ្លាញគេយ៉ាងងាយក្រោយពេលដែលគេធំ៕

អ្នកម៉ាក់ទើបសម្រាលកូន! ត្រូវធ្វើរឿងទាំង៧នេះអោយបាន

ការសម្រាលកូនគឺជារឿងដែលពិបាកបំផុតទៅហើយ ការមើលថែខ្លួនបន្ទាប់ពីសម្រាលកូនរួចនោះរឹតតែជារឿងមិនងាយស្រួលទៅទៀត។ ម្តាយមានតួនាទីសំខាន់បំផុតនៅក្នុងការយកចិត្តទុកដាក់លើសុខភាព និងរបបអាហារនានារបស់ខ្លួន ព្រោះថាបើសិនជាមើលថែខ្លួនមិនបានល្អទេនោះ ទាំងម្តាយ និងកូនសុទ្ធតែអាចមានបញ្ហា ព្រោះកូននៅតែទទួលយកជីវជាតិពីម្តាយបន្ទាប់ពីកើតចេញមក។

ដើម្បីរក្សាសុខភាពម្តាយអោយបានល្អ ខាងក្រោមនេះគឺជារឿងទាំង៧យ៉ាងដែលស្ត្រីទើបសម្រាលកូនរួចត្រូវតែធ្វើ៖

១. បរិភោគអោយត្រឹមត្រូវ និងគ្រប់គ្រាន់

ភាគច្រើនស្ត្រីដែលមានកូនតែងតែឡើងទម្ងន់យ៉ាងច្រើនមុនពេលសម្រាល ដូច្នេះហើយទើបបានជាភាគច្រើនបន្ទាប់សម្រាលរួច ពួកគេមិនសូវជាហ៊ានបរិភោគនេះនោះច្រើនដូចមុននោះទេ។ ប៉ុន្តែធាតុពិតទៅអ្នកគួរតែបរិភោគអោយបានគ្រប់គ្រាន់ និងត្រឹមត្រូវបានរបបអាហារ ព្រោះថាកូនរបស់អ្នកនឹងនៅតែទទួលយកជីវជាតិទាំងនោះតាមរយះទឹកដោះ។

២. កុំឈប់លេបវីតាមីនសម្រាប់អ្នកមានគភ៌

ថ្វីត្បិតតែអ្នកសម្រាលកូនរួចមែន តែអ្នកគួរតែនៅបន្តលេបវីតាមីនសម្រាប់អ្នកមានគភ៌នោះ ព្រោះវាអាចជួយអោយសុខភាពអ្នកឆាប់ត្រលប់មករឹងមាំ និងជួយរក្សាអ្នក និងកូនអោយមានវីតាមីនបំប៉នគ្រប់គ្រាន់។

៣. ព្យាយាមកុំអោយមានគេមកលេងច្រើនពេក

ភាគច្រើនបន្ទាប់ពីសម្រាលកូនរួច អ្នកប្រាកដជាមានមនុស្សជាច្រើនដែលចង់មកលេង ឬសួរសុខទុក្ខជាដើម ប៉ុន្តែវាមិនមែនជារឿងដែលល្អបំផុតនោះទេនៅកំឡុងពេលភ្លាមៗនោះ ដោយសារបន្ទាប់ពីសម្រាលរួច អ្នកត្រូវសន្សំកម្លាំងមកវិញដោយប្រើពេលយ៉ាងច្រើន ដូច្នេះការដែលអ្នកមកលេងអាចធ្វើអោយអ្នកចំនាយកម្លាំងទទួល និងធ្វើអោយអ្នកឆាប់អស់កម្លាំង ខ្សោយ។

៤. គេងអោយបានច្រើន

ដើម្បីអោយខ្លួនអ្នកអាចត្រលប់មកធាតុដើមវិញ អ្នកត្រូវគេអោយបានច្រើន ព្រោះការគេងគ្រប់គ្រាន់អាចធ្វើអោយខ្លួនអ្នកឆាប់មានសុខភាពប្រសើរឡើងវិញយ៉ាងលឿនបំផុត។

៥. ត្រូវមានភាពអត់ធ្មន់ ក្នុងការបំបៅដោះ

ថ្វីត្បិតតែការបំបៅដោះមើលទៅហាក់ដូចជាងាយស្រួល ប៉ុន្តែវាមិនប្រាកដនោះទេ ជាពិសេសសម្រាប់អ្នកដែលទើបតែមានកូនដំបូង។ ដូច្នេះអ្នកគួរតែត្រៀមខ្លួនអោយបានរួចរាល់នៅក្នុងការបំបៅដោះ និងកុំរំពឹងថាវាជារឿងងាយស្រួលអោយសោះ។

៦. ថែរក្សាកន្លែងសំខាន់អ្នកអោយបានល្អ និងមានអនាម័យ

ប្រសិនជាអ្នកសម្រាលកូនតាមបែបធម្មជាតិ ការឈឺចាប់នៅទ្រង់កន្លែងសំខាន់នោះប្រាកដជាពិបាកនឹងអោយអ្នកទ្រាំខ្លាំងណាស់ ប៉ុន្តែទោះជាបែបនេះក៏ដោយ អ្នកត្រូវតែថែរក្សាអនាម័យវាអោយបានល្អបំផុត ព្រោះពេលនោះឡើយជាពេលដែលមេរោគចូលជ្រៀតជ្រែកបានយ៉ាងងាយស្រួល។

៧. មានបញ្ហាអ្វី ត្រូវទៅពិគ្រោះជាមួយគ្រូពេទ្យ

ជាថ្មីម្តងទៀត សុខភាពរបស់អ្នកត្រូវការការថែទាំយ៉ាងម៉ត់ចត់បំផុត ដូច្នេះដើម្បីបង្ការបញ្ហាអកុសល្យអ្វីមួយកើតឡើង អ្នកគួរតែរួសរាន់ទៅពិគ្រោះជាមួយគ្រូពេទ្យជំនាញដើម្បីទទួលការពិនិត្យអោយបានច្បាស់លាស់៕

តិចនិកទាំង10នេះ! អ្នកម៉ាក់ពពោះត្រូវធ្វើអោយបាន ដើម្បីសុខភាពម្តាយនិងកូន

នៅអំឡុងពេលមានផ្ទៃពោះជាពេលវេលាដ៏សំខាន់ក្នុងការថែទាំទាំងសុខភាពម្តាយ និងទារក ដើម្បីសុវត្ថិភាពជាចម្បងសម្រាប់ថ្ងៃសម្រាលបុត្រនៅក្នុងពេលខាងមុខ។

ដោយឡែកថ្ងៃនេះយើងនឹងបង្វែរអារម្មណ៍មិត្តអ្នកអានមកដឹងពីគន្លឹះសំខាន់ៗក្នុងការថែទាំសុខភាពម្តាយនិងកូនដើម្បីសុវត្ថិភាពក្នុងពេលសម្រាល ជាមួយនឹងទារកដែលកើតមកពេញដោយសុខភាពល្អដូចខាងក្រោម៖

១. ហាត់ប្រាណឱ្យបានទៀងទាត់

ការហាត់ប្រាណឱ្យបានទៀងទាត់ ដោយវិធីងាយៗតិចៗថ្នមៗរាងកាយ ជាវិធីល្អ សម្រាប់សុខភាពម្តាយនិងកូនក្នុងផ្ទៃដោយអាចការពារអ្នកពីជំងឺឡើងសម្ពាធឈាម ហើយថែមទាំងជួយធ្វើឱ្យរូបរាងអ្នកមិនសូវផ្លាស់ប្តូរទ្រង់ទ្រាយហួសហេតុពេក ជាហេតុធ្វើឱ្យរូបរាងរបស់អ្នកអាចឆាប់ត្រលប់មកសភាពល្អស្អាតវិញបាន ក្រោយពីសម្រាលកូនរួចផងដែរ។ លំហាត់ប្រាណដែលសមស្របរួមមាន៖ ការដើរតិចៗ, ការហែលទឹក, ហាត់យូហ្គា (Yoga) និងលំហាត់ប្រាណកាច់ដៃកាច់ជើងងាយៗ ( Pilates) ។ ក្នុងនោះអ្នកក៏អាចធ្វើលំហាត់ប្រាណផ្សេងក៏បាន ដែលមិនធ្វើឱ្យប៉ះពាល់ដល់សុខភាព។

២. ពិនិត្យគ្រឿងសម្អាង

នៅក្នុងអំឡុងពេលមានផ្ទៃពោះ គ្រឿងសម្អាងនានាអាចធ្វើឱ្យប៉ះពាល់ដល់សុខភាពទារកក្នុងផ្ទៃបាន។ ដូច្នេះអ្នកមិនគួរប្រើគ្រឿងតុបតែងមុខប្រេងម្សៅនោះទេ ប៉ុន្តែប្រសិនជាអ្នកចង់ប្រើគួរជ្រើសរើសគ្រឿងសម្អាងដែលធ្វើមានគ្រឿងផ្សំពីធម្មជាតិ ឬរ៉ែទើបជាការល្អ។

៣.ផ្លាស់ប្តូររបបអាហារទទួលទាន

អ្នកគួរតែទទួលទានអាហារដែលមានប្រយោជន៍ចំពោះសុខភាពម្តាយ និងកូនក្នុងផ្ទៃដូចជា៖ អាហារដែលមានជាតិកាកសសៃ (Fiber) រួមមានបន្លែ ផ្លែឈើ សណ្តែក អង្ករសម្រូប គ្រាប់ធញ្ញជាតិ ទឹកដោះគោជូរ ត្រីសាល់ម៉ុន និងបង្គារ តែគួរចៀសវាងត្រី សាច់ដែលមានជាតិបារតច្រើន។ ក្នុងនោះដែរ អ្នកគួរតែចៀសវាងការទទួលទានភេសជ្ជៈដែលមានជាតិកាហ្វេអ៊ីន អាហារកែច្នៃលាយពណ៌ អាហារដែលចម្អិន និងម្ហូបផ្សេងៗ ត្រី សាច់ បន្លែដែលសម្បូរទៅដោយបាក់តេរីមិនល្អ។ ជាពិសេសបន្ថែមរបបអាហារដែលល្អៗមានជាតិកាឡូរីយ៉ាងហោចណាស់ ឱ្យបាន ៣០០ ទៅ ៥០០កាឡូរីក្នុងមួយថ្ងៃទើបជាការប្រសើរ។

៤.បន្ធូរបន្ថយសាច់ដុំ

នៅពេលមានផ្ទៃពោះស្ត្រីភាគច្រើនតែងតែជួបប្រទះនឹងបញ្ហារមួលក្រពើជាញឹកញាប់។ ដើម្បីកាត់បន្ថយបញ្ហាទាំងនេះអ្នកគួរតែធ្វើការហាត់ប្រាណតិចៗសន្ធឹងដៃសន្ធឹងជើង ម៉ាស្សាឈ្លីសាច់ដុំ ឬស្អំទឹកកកបន្ថែមក៏បាន។ ការអនុវត្តវិធីបែបនេះជារៀងរាល់ថ្ងៃ ជាពិសេសរាល់យប់មុនពេលចូលគេង ការផឹកទឹកឱ្យបានច្រើនរួមនឹងទទួលទានរបបអាហារល្អៗក៏អាចជួយកាត់បន្ថយអាការរមួលក្រពើបានយ៉ាងងាយផងដែរ។

៥. ផឹកទឹកឱ្យបានច្រើន

ការផឹកទឹកឱ្យបានច្រើនយ៉ាងហោចណាស់ឱ្យបាន ១០កែវក្នុងមួយថ្ងៃ និងយកទឹកស្អាតទុកជាប់នឹងខ្លួនគ្រប់ពេលវេលាដែលអ្នកស្រេកទឹក អាចជួយការពារអាការក្អួតចង្អោរ និងរក្សាបរិមាណទឹកភ្លោះបានល្អគ្រប់គ្រាន់ក្នុងពេលសម្រាលកូនបានផងដែរ។ ប៉ុន្តែរាល់យប់មុនចូលគេងអ្នកមិនគួរផឹកទឹកច្រើនពេកនោះទេ វាអាចធ្វើឱ្យអ្នកពិបាកនឹងចូលបន្ទប់ទឹកញឹកញាប់ផងដែរ។

៦. ទៅស្ប៉ា ឬម៉ាស្សា

ការស្ប៉ា និងម៉ាស្សាដងខ្លួននៅក្នុងពេលមានផ្ទៃពោះអាចជួយឱ្យរាងកាយ និងអារម្មណ៍អ្នកបានធូរស្រាលមួយកម្រិត។ បើទោះជាវាល្អមែន ប៉ុន្តែអ្នកគូរតែចៀសវាងសូណា ឬងូតទឹកក្តៅច្រើនពេកដែលវាអាចធ្វើឱ្យប៉ះពាល់ដល់ទារកក្នុងផ្ទៃផងដែរ។ ជាពិសេសប្រេងមួយចំនួនដែលប្រើនៅពេលម៉ាស្សា ឬស្ប៉ាត្រូវបានហាមឃាត់ និងប្រើប្រាស់ក្នុងពេលមានផ្ទៃពោះ។ ដូច្នេះអ្នកគួរតែប្រើប្រាស់វិធី ឬផលិតផលធម្មជាតិ ដែលយកល្អគួរតែពិគ្រោះជាមួយវេជ្ជបណ្ឌិតមុននឹងចង់ទៅហាងម៉ាស្សាទើបជាការល្អ។

៧.ដំណើរកម្សាន្តដោយធ្វើការហោះហើរ

វេលាល្អសម្រាប់ការធ្វើការហោះហើរនោះ គឺអំឡុងពេលមានផ្ទៃពោះ ពី ១៤ ទៅ ២៨សប្តាហ៍ ដែលជាពេលវេលាមានហានិភ័យតិចបំផុតនៃគ្រោះថ្នាក់ផ្សេងៗដូចជាការរលូតកូន ការសម្រាលកូនមុនកំណត់ និងការកើតជំងឺផ្សេងៗ។ យ៉ាងណាក៏ដោយអ្នកគួរតែពិគ្រោះជាមួយវេជ្ជបណ្ឌិត ឬបញ្ជាក់ប្រាប់ខាងក្រុមហ៊ុនយន្តហោះពីការមានផ្ទៃពោះរបស់អ្នកជាមុនសិន មុននឹងជិះយន្តហោះ។ ក្នុងនោះផងដែរ សម្រាប់ការធ្វើដំណើរលើយន្តហោះ អ្នកគួរតែផឹកទឹកឱ្យបានច្រើន ឧស្សាហ៍ក្រោកដើរចុះឡើង និងម្យ៉ាងទៀតរកកន្លែងអង្គុយក្បែរផ្លូវដើរជាជម្រើសដែលល្អបំផុត។

៨. ប្រើផលិតផលធម្មជាតិ ឬឱសថបុរាណធម្មជាតិ

អ្នកគួរតែងាកមកប្រើឱសថបុរាណធម្មជាតិដើម្បីសម្រាលអាការក្អួតចង្អោរ ទល់លាមក និងក្រហាយទ្រូងក្នុងអំឡុងពេលមានផ្ទៃពោះប្រសើរជាង។ ដោយខ្ញី និងស្លឹកជីអង្កាមអាចជួយបំបាត់អាការក្អួតចង្អោរ ។ ការត្រាំទឹកក្តៅ និងការធ្វើលំហាត់ប្រាណងាយៗជួយដោះស្រាយបញ្ហាទល់លាមក ចំណែកឯការទំពារស្ករកៅស៊ូគ្មានជាតិស្ករ និងការផកទឹកក្តៅឧណ្ហៗអាចបន្ថយអាការក្រហាយទ្រូងបានយ៉ាងប្រសើរ។

៩.លាបក្រែមការពារកម្តៅថ្ងៃ

នៅពេលអ្នកមានផ្ទៃពោះ ស្បែករបស់អ្នកនឹងឡើងស្តើងហើយងាយរងប្រតិកម្មពីកម្តៅថ្ងៃណាស់។ យកល្អអ្នកគួរតែស្លៀកសំលៀកបំពាក់ឱ្យជិតៗពាក់មួកពាក់វ៉ែនតា និងលាបផលិតផលការពារកម្តៅថ្ងៃផងទើបជាការល្អ។ ក្នុងនោះផងដែរ គ្រូពេទ្យមួយចំនួនថែមទាំងបានណែនាំឱ្យស្ត្រីមានផ្ទៃពោះចៀសវាងឱ្យដាច់ខាតពីពន្លឺព្រះអាទិត្យ ព្រោះវាអាចធ្វើឱ្យប៉ះពាល់ដល់សុខភាពម្តាយ និងទារកផងដែរ។

១០. ឥរិយាបថនៃការគេង

ការគេងសង្កត់លើពោះត្រូវបានហាមឃាត់ជាដាច់ខាតក្នុងពេលមានផ្ទៃពោះ។ អ្នកគួរតែគេងដាក់ខ្នងប៉ះផ្ទាល់នឹងផ្ទៃគ្រែគេង ព្រោះទម្ងន់ទារក និងស្បូនរបស់អ្នកពឹងផ្អែកទាំងស្រុងនឹងឆ្អឹងខ្នងនិងសសៃឈាមធំៗអស់ទាំងនោះ ។ ម្យ៉ាងការគេងបែបនេះថែមទាំងអាចកាត់បន្ថយអាការស្ទះសសៃឈាមបានផងដែរ។ ជាពិសេសឥរិយាបថគេងដែលល្អសម្រាប់សុខភាពទារកនោះគឺការគេងបែរមកចំហៀង រួចអង្កុញជើងរបស់អ្នកបន្តិច។

វិន័យក្នុងការអប់រំកូន! ជំរុញឱ្យគេមានសណ្តាប់ធ្នាប់ល្អក្នុងសង្គម

កុមារតូចៗជាផ្នែកយ៉ាងសំខាន់មួយដែលមិនអាចមើលរំលងបាន ព្រោះពួកគេនឹងក្លាយជាធនធានមនុស្សយ៉ាងសំខាន់នៅថ្ងៃអនាគត។ អ្វីគ្រប់យ៉ាងគឺចាប់ផ្តើមពីក្មេង ប្រសិនបើក្មេងមានគុណភាពនៃគំនិតខ្ពស់ នៅពេលដែលពួកគេធំឡើង គេនឹងក្លាយជាធនធានដែលមានភាពខ្លាំងក្លាសម្រាប់សង្គម។

នាពេលបច្ចុប្បន្ននេះ ត្រូវបានគេមើលឃើញថា នៅតាមដងផ្លូវក្តី នៅក្នុងទីផ្សារមួយចំនួនក្តី និងនៅតាមទីសាធារណៈសំខាន់ៗមួយចំនួនក្នុងទីប្រជុំជនក្តី ទិដ្ឋភាពនៃភាពអនាធិបតេយ្យបានស្តែងចេញតាមរយៈសកម្មភាពរបស់មនុស្សមួយចំនួនធំ ដែលមិនសូវខ្វល់ពីផលប៉ះពាល់នៃទង្វើរបស់ខ្លួន។

នៅលើដងផ្លូវយើងគ្រប់គ្នាសុទ្ធតែបានឃើញពីការបើកបរដែលរញ៉េរញ៉ៃ និងដណ្តើមគ្នាទៅមុន ឬគោរពច្បាប់ចរាចរណ៍មិនល្អ ដែលបណ្តាលឱ្យមានការកកស្ទះ ចំណែកឯនៅទីសាធារណៈ និងនៅតាមទីផ្សារមួយចំនួនយើងក៏បានឃើញផងដែរពីការចោលសំរាមក្រៅធុងសំរាម រួមទាំងការដាក់តាំងលក់យ៉ាងអនាធិបតេយ្យ។

សកម្មភាពទាំងនេះ បានធ្វើឱ្យប៉ះពាល់ដល់មនុស្សជាច្រើនផ្សេងទៀតដែលព្យាយាមគោរពនូវសណ្តាប់ធ្នាប់ល្អ ក៏ដូចជាគោរពច្បាប់។

ពាក់ព័ន្ធទៅនឹងបញ្ហានេះ លោកបណ្ឌិត ចាន់ សុផល បានធ្លាប់បានលើកឡើងនៅក្នុងបណ្តាញសង្គមរបស់លោកថា ការបណ្តុះបណ្តាលទម្លាប់ល្អ ជាពិសេសការបណ្តុះមនុស្សមិនឱ្យចោលសំរាមផ្តេសផ្តាស គឺគួរចាប់ផ្តើមពីកូនក្មេង ព្រោះប្រសិនបើយើងបានបណ្តុះបណ្តាលក្មេងឱ្យមានទម្លាប់ល្អ នៅពេលដែលគេធំឡើង គេនឹងរៀបចំខ្លួនឯងឱ្យមានសណ្តាប់ធ្នាប់។

ឆ្លើយតបជាមួយនឹងបញ្ហានេះផងដែរ ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងផងដែរថា ការអប់រំក្មេងជារឿងមួយ ពេលខ្លះក្មេងនៅសាលាតែប៉ុន្មានម៉ោងតែប៉ុណ្ណោះ ខណៈក្មេងនៅជាមួយអាណាព្យាបាលស្ទើរពេញមួយថ្ងៃ។ ការអប់រំ មនុស្សចាស់ឱ្យបង្កើតគំរូល្អដល់ក្មេងៗក៏ជារឿងសំខាន់មួយដើម្បីលុបបំបាត់ភាពអនាធិបតេយ្យក្នុងសង្គម៕

ប៉ាម៉ាក់គួរដឹង! របៀបទាំង8 ក្នុងការថែទាំទារកទើបកើត

ទារកទើបនឹងកើតនាំមកនូវភាពរំភើបរីករាយទាំងម្តាយទាំងឪពុក ស្របគ្នានោះដែរបន្ទុកក៏ត្រូវតែស្មើគ្នាដែរ។ ឪពុកម្តាយថ្មីថ្មោងអាចនឹងជួបប្រទះការពិបាកច្រើនដូចជាគេងមិនបានគ្រប់គ្រាន់ មិនចេះបីកូន បំបៅដោះកូន និងងូតទឹក។ល។ ពេលនេះកញ្ញានឹងបង្ហាញអ្នកពីវិធីខ្លះៗដែលអាចជួយសម្រាលបន្ទុកឪពុកម្តាយថ្មីថ្មោង៖

១. របៀបបីទារក

នៅពេលទារកបានមកដល់ដៃអ្នកភ្លាម អ្នកប្រហែលជាមិនទម្លាប់ក្នុងការបីទេព្រោះទារកតូចពិបាកបី។ ករបស់ទារកគឺជាផ្នែកសំខាន់បំផុត អញ្ចឹងហើយនៅពេលចាប់កាន់ទារកឡើងអ្នកត្រូវយកដៃម្ខាងចាប់ទ្រក្បាលទារកព្រោះទារកមិនអាចទប់ក្បាលខ្លួនឯងបាននោះទេ រីឯដៃម្ខាងទៀតត្រូវទ្រចង្កេះ។ ជាពិសេសត្រូវប្រយ័ត្នចំពោះបង្ហើយក្មេង។

២. ត្រូវថែទាំទារកកំឡុងពេល៣០ថ្ងៃរបៀបណា?

ទារកនៅក្នុងកំឡុង៣០ថ្ងៃគឺត្រូវប្រយ័ត្នបំផុត។ តែការបារម្ភរបស់អ្នកក៏មិនត្រូវលើសដែនកំណត់ដែរព្រោះអាចធ្វើឱ្យអ្នកញ៉ាំ ឬគេងមិនបានគ្រប់គ្រាន់ជាហេតុនាំឱ្យខ្វះទឹកដោះ។ នៅក្នុងកំឡុងពេល៣០ថ្ងៃនោះ អ្នកគួរតែថែទាំសុខភាពឱ្យបានល្អនិងញ៉ាំឱ្យបានច្រើនព្រោះទារកក្នុងកំឡុងពេលនេះត្រូវការទឹកដោះច្រើន និងការថែទាំឱ្យបានដិតដល់។ ហើយអ្នកគួរតែគេងនៅពេលទារកគេងដែរ។

៣. របៀបរុំកូនទារក

ការរុំទារកឱ្យបានត្រឹមត្រូវជួយឱ្យទារកគេងបានស្ងប់ល្អ និងនៅស្ងៀម។ ជំហានដំបូង អ្នកត្រូវបត់កន្សែងឱ្យរាងដូចពេជ្រ រួចដាក់ទារកលើកន្សែងហើយបត់កន្សែងពីឆ្វេងមកស្តាំ ពីក្រោមឡើងលើ ហើយចុងបញ្ចប់បត់ពីស្តាំមកឆ្វេង។

៤. របៀបបំបៅដោះទារក

ការបំបៅដោះទារកគឺសំខាន់បំផុតកំឡុងពេល២ឬ៣ថ្ងៃដំបូង ព្រោះកំឡុងពេលនេះទារកត្រូវការទឹកដោះដំបូងដើម្បីធំធាត់។ អ្នកម្តាយអាចនឹងជួបប្រទះកង្វះទឹកដោះ ដំបៅក្បាលដោះ ឬសំបូរឬទឹកដោះពេក ហើយទារកខ្លះមិនសូវចង់បៅ។ ការបីទារកក៏ជារឿងសំខាន់ព្រោះទារកខ្លះមិនចង់បៅដោយសារតែការបីមិនស្រួល។ វិធីបំបៅដោះមានច្រើនរបៀប (ដូចក្នុងរូប) អ្នកគួរតែសាកឱ្យគ្រប់របៀបដើម្បីចង់ដឹងថារបៀបមួយណាដែលកូបអ្នកអាចបៅបានច្រើន។

៥. របៀបសង្គ្រោះបន្ទាន់ និងធ្វើឱ្យទារកភើ

ការភើគឺជាការចាំបាច់ដើម្បីឱ្យទារកមានសុខភាពល្អជាពិសេសនៅក្នុងកំឡុងពេល២ឬ៣ខែដំបូង។បើសិនជាទារកមានសុខភាពល្អប្រាកដជាបៅបានច្រើននិងគេងបានស្កប់ស្កល់។ ដើម្បីធ្វើឱ្យក្មេងភើអ្នកគួរតែបីហើយដាក់ចង្កាទារកលើស្មារបស់អ្នក តែកុំភ្លេចទប់ក្បាលនិងក បន្ទាប់មកព្យាយាមអង្អែលខ្នងទារកតិចៗទាល់តែភើ។ វិធីមួយទៀតគឺដាក់ទារកផ្កាប់មុខចុះលើភ្លៅរបស់អ្នក ដៃម្ខាងទប់ដើមទ្រូងនិងករបស់ទារកហើយលើកគូទទារកឱ្យខ្ពស់ជាងក្បាលរួចអង្អែលខ្នងថ្នមៗ។ សម្រាប់ការសង្គ្រោះបឋម នៅពេលដែលទារកស្លាក់ អ្នកគួរតែដាក់ទារកចុះលើភ្លៅរួចយកម្រាមពីរសង្កត់ដើមទ្រូង៥ដងចាំផ្លុំទាល់តែទារកចាប់ផ្តើមក្អក។ តែត្រូវចាំថាទារកនៅតូច អ្នកមិនអាចសង្កត់ញាប់ពេក ឬខ្លាំងពេកនោះទេ។

៦. របៀបម៉ាស្សាទារក

ការម៉ាស្សាជួយឱ្យឆ្អឹងទារករឹងមាំ និងសាច់ដុំរឹងល្អ។ អ្នកមិនគួរម៉ាស្សានៅពេលដែលទើបបំបៅទារក ឬមុនពេលបំបៅទេ។ ជំហានដំបូងអ្នកត្រូវដាក់ទារកលើកន្សែង ឬកម្រាលទន់ៗរួចចាប់ផ្តើមម៉ាស្សាដោយប្រើប្រេងបន្លែពីជើងទៅមុនបន្ទាប់មកដៃ ដើមទ្រូងហើយខ្នង។

៧. របៀបងូតទឹក

ឪពុកម្តាយថ្មីថ្មោងពិបាកបំផុតគឺការងូតទឹកនេះឯង។ ការងូតទឹកឱ្យទារកគឺមានច្រើនរបៀបទៅតាមចំនួនសប្តាហ៍។ អ្នកគួរតែចាំដល់ផ្ចិតរបស់ស្ងួត ហើយជ្រុះសិនសឹមងូតទឹកដោយប្រើក្បាក់។ ជាពិសេសត្រូវវាស់កម្តៅទឹកឱ្យបានត្រឹមត្រូវ ហើយត្រូវងូតដោយប្រុងប្រយ័ត្នទឹកចូលត្រចៀក។

៨. របៀបផ្លាស់ប្តូរខោទឹកនោម

អ្នកត្រូវចាំថាការផ្លាស់ប្តូរខោទឹកនោមត្រូវប្រយ័ត្នបំផុតទាល់តែផ្ចិតរបស់ទារកជ្រុះ។ អ្នកមិនត្រូវស្លៀកខោទឹកនោមបិទលើផ្ចិតរបស់ទារក ឬរិតតឹងពេកទេជាពិសេសទារិកាព្រោះវាអាចធ្វើឱ្យរលាកឬរោល។ ត្រូវប្រាកដថាអ្នកជូតទារកបានស្ងួតហើយមុននឹងស្លៀកខោទឹកនោម៕

ប្រភព៖ Brightside

តិចនិកទាំង៤! ជួយអោយស្បែកអ្នកម៉ាក់ កាន់តែសស្អាតបាន

មនុស្សស្រីគ្រប់រូបមិនថាគេ ឬខ្ញុំទេ តែងតែមានបំណងប្រាថ្នាចង់បានស្បែករលោងស្អាង ប៉ុន្តែការប៉ះពាល់នឹងពន្លឺះព្រះអាទិត្យច្រើនម៉ោង ឬស្រ្តេសច្រើនពេក និងខ្យល់អាកាសបំពុលទៀតនោះ ពិតជាអាចធ្វើឲ្យប្រែប្រួលដល់សារធាតុបំពាក់ពាក់ដល់ស្បែក និងមើលទៅកាន់តែខ្មៅជាងមុនជាមិនខាន។ ភាគច្រើនមានក្រែមធ្វើឲ្យស្បែកភ្លឺរលោងច្រើនណាស់ដែលដាក់លក់នៅលើទីផ្សា ប៉ុន្តែដើម្បីកាន់តែមានសុវត្ថិភាព អ្នកគួរតែជ្រើសរើសមធ្យោបាយធម្មជាតិវិញទៅ។

1#យ៉ាអួ

យ៉ាអួគឺជាជម្រើសដ៏ល្អបំផុតមួយដែលអាចប្រើដើម្បីព្យាបាលស្បែកតាមបែបធម្មជាតិបាន ព្រោះតែវាផ្ទុកទៅដោយសារធាតុជួយឲ្យស្បែកភ្លឺរលោង។ សារធាតុ Lactic Acid ក៏មានក្នុងយ៉ាអួនេះដែរ ដើម្បីផ្តល់ជីវជាតិដល់ស្បែក និងកំចាត់ចោលរាល់កោសិកាងាប់ៗ ព្រមទាំងស្បែកកាន់តែភ្លឺរលោងថែមមួយកម្រិតទៀត។ ចូរលាបយ៉ាអួនៅលើស្បែកដែលកំពុងមានបញ្ហា និងទុកចោល ៣ ទៅ៥នាទី ចាំលាងចេញជាមួយទឹកក្តៅឧណ្ហៗ។

2#ទឹកឃ្មុំ

ក្រៅពីផ្អែមបែបធម្មជាតិហើយនោះ ទឹកឃ្មុំក៏មានប្រសិទ្ធភាពក្នុងការផ្តល់ភាពភ្លឺរលោងដល់ស្បែក ផង និងផ្តល់សំណើមផង។ ទឹកឃ្មុំមានសារធាតុប្រឆាំងនឹងបាក់តេរី ដែលអាចជួយលុបបំបាត់អាការៈនៃការកើតស្នាមអុចៗដោយសារអាយុច្រើន និងភាពជ្រីវជ្រួញផង។ អ្នកអាចលាយទឹកក្រូចឆ្មាមួយស្លាបព្រាកាហ្វេ ទឹកឃ្មុំមួយស្លាបព្រាកាហ្វេ ប្រេងផ្លែអាលម៉ុនកន្លះស្លាបព្រាកាហ្វេ និងម្សៅទឹកដោះគោមួយស្លាបព្រាបាយ ដើម្បីបង្កើតជាល្បាយមួយ។ ចូរយកល្បាយនេះលាបលើស្បែក ហើយទុកចោល ១០ ទៅ១៥នាទី បន្ទាប់មកចាំលាងវាចេញជាមួយទឹកត្រជាក់។

3#ទឹកដោះគោ

ទឹកដោះគោត្រូវបានគេស្គាល់ថាមានជាតិកាលស្យូមខ្ពស់ ដេលអាចជួយសម្រួលដល់ពណ៌របស់ស្បែកបាន។ ការលាបជាតិកាលស្យូមនេះនៅលើស្រទាប់ស្បែកខាងលើ អ្នកនឹងទទួលបានការការពារកាន់តែច្រើនពីភាពស្ងួតរបស់ស្បែក។ កាលស្យូមអាចពង្រឹងដល់ជាតិមេឡានីន ដែលជួយដល់ការបង្កើនភាពភ្លឺរលោងរបស់ស្បែកទៀតផង។ ចូរលាបទឹកដោះគោដែលក្តៅឧណ្ហៗលើស្បែកដែលមានបញ្ហា ហើយម៉ាស្សាវាពី ៣ ទៅ៥នាទី ចាំលាងវាចេញ។ ចូរធ្វើបែបនេះរាល់ថ្ងៃរយៈពេល ២សប្តាហ៍។

4#ជែលប្រទាលកន្ទុយក្រពើ

ជែលបានមកពីប្រទាលកន្ទុយក្រពើអាចជួយផ្តល់ភាពរលោងដល់ស្បែក ផងបន្ថយស្នាមអុចៗលើស្បែកផង និងបង្កើនភាពតឹងរបស់ស្បែកថែមទៀត។ ដំបូងឡើយ អ្នកអាចលាបវាផ្ទាល់លើស្បែក ហើយទុកចោល ៣០នាទីសិនចាំលាងវាចេញ។ អ្នកអាចធ្វើការងារនេះពីរដងក្នុងក្នុងមួយថ្ងៃរយៈពេល ២សប្តាហ៍ដើម្បីឃើញលទ្ធផល៕

រូបមន្តសម្រកជាតិខ្លាញ់! សម្រាប់អ្នកម៉ាក់ទើបសម្រាលកូនហើយ

ការចង់ស្កម គឺជារឿងមួយដែលស្រ្តីគ្រប់រូបតែងតែប្រាថ្នា ព្រោះថារាងស្គមនឹងជួយឲ្យពួកគេសប្បាយចិត្ត និងស្រស់ស្អាត។ ដូច្នេះដើម្បីសម្រេចបាននូវក្តីស្រមៃបែបនេះ ពួកគេតែងតែប្រើវិធីបង្អត់អាហារ និងព្យាយាមទិញផលិតផលសម្រកទម្ងន់ដែលមានតម្លៃថ្លៃ។ យ៉ាងណាមិញ យើងមានរូបមន្តសម្រកទម្ងន់មួយប្រភេទដែលអាចនិយាយបានថាមានប្រយោជន៍ដែរក្នុងការរំលាយជាតិខ្លាញ់ពីក្នុងខ្លួន។

គ្រឿងផ្សំ៖

ទឹកស្អាត ៨ពែង
ខ្ញីម៉ត់ មួយស្លាបព្រាបាយ
ត្រសក់ចិតជាស្លាយៗចំនួនមួយផ្លែ
ក្រូចឆ្មាចិតជាស្លាយៗមួយផ្លែ
ជីង្កាមកន្លះកូនចានចង្កឹះ

ចូរលាងគ្រឿងផ្សំទាំងអស់ចូលក្នុងសូរទឹកមួយ ហើយទុកចោលមួយយប់ក្នុងទូរទឹកករហូតដល់ ២ថ្ងៃ។ នៅថ្ងៃបន្ទាប់អ្នកអាចញ៉ាំវាយ៉ាងហោចណាស់កន្លះកែវមុនពេលញ៉ាំអាហារម្តងៗ។ ចូរធ្វើបែបនេះរយៈពេល ៤ថ្ងៃ។ (ភេសជ្ជៈមួយនេះតែមួយមុខទំនងជាមិនសូវមានប្រសិទ្ធភាពឡើយបើសិនជាមិនមានការគ្រប់គ្រងរបបអាហារត្រឹមត្រូវដែរនោះ។

ចំណាំ៖ មុនអ្នកសាកល្បងធ្វើវិធីមួយនេះ អ្នកគប្បីពិគ្រោះជាមួយគ្រូពេទ្យជាមុនសិនថា តើសុខភាពអ្នកអំណោយផលដល់ការធ្វើបែបនេះឬអត់ ដើម្បីចៀសវាងបញ្ហាកើតមានផ្សេងៗ៕

អ្នកម៉ាក់ពពោះ! មានជំងឺមហារីក អាចឆ្លងដល់កូនទេ?

ប្រភេទនៃជំងឺមហារីកមួយចំនួនអាចកើតមាននៅក្នុងក្រុមគ្រួសារ (តំណរពូជ) នេះបានន័យថា អ្នកអាចមានជំងឺមហារីកប្រសិនបើឪពុក ឬម្តាយរបស់អ្នកបានកើតជំងឺនេះ តែវាមិនមែនជាការឆ្លងពីពួកគាត់មកអ្នកនោះទេ។

ឧទាហរណ៍ ប្រភេទនៃជំងឺមហារីកដែលអ្នកអាចមានហានិភ័យខ្ពស់ដូចជាជំងឺមហារីកសុដន់ ពោះវៀនធំ ឬជំងឺមហារីកក្រពេញអូវែ ប្រសិនបើអ្នកមានសាច់ញាតិកើតជំងឺនេះ។

ទោះជាយ៉ាងណា នេះមិនមែនមានន័យថា អ្នកនឹងកើតជំងឺនេះនោះទេ ប្រសិនបើសមាជិកគ្រួសារណាម្នាក់មានជំងឺមហារីកមួយចំនួននេះ ប៉ុន្ តែអ្នកអាចនឹងមានហានិភ័យខ្ពស់ក្នុងការវិវត្តទៅជាជំងឺមហារីកទាំងនេះ បើប្រៀបធៀបទៅមនុស្សផ្សេងទៀត។

វាជាការសំខាន់ក្នុងការបានដឹងថាមានតែ ៥ ទៅ ១០ % នៃមហារីកប៉ុណ្ណោះ ដែលត្រូវបានបង្កឡើងដោយបញ្ហាហ្សែនតំណរពូជនេះ។

ប្រសិនបើសមាជិកគ្រួសារជិតស្និទ្ធណាម្នាក់មានជំងឺមហារីកដែលបានរៀបរាប់ខាងលើហើយអ្នកមានការព្រួយបារម្ភថា អ្នកអាចនឹងមានជំងឺមហារីកដែរនោះ សូមទៅជួបគ្រូពេទ្យរបស់អ្នក។ គ្រូពេទ្យនឹងសួរសំណួរអ្នកអំពីប្រវត្តិគ្រួសារ ហើយប្រសិនបើគាត់គិតថាអ្នកអាចមានហានិភ័យខ្ពស់នៃការវិវត្តទៅជាជំងឺមហារីក ពួកគាត់នឹងបញ្ជូនអ្នកទៅអ្នកផ្តល់ប្រឹក្សាខាងហ្សែន ឬអ្នកជំនាញផ្នែកជំងឺមហារីក៕

ជិតដល់ថ្ងៃសម្រាល! ម៉ាក់ៗត្រូវប្រយ័ត្នពីរឿង៤នេះ អោយបាន

ខាងក្រោមនេះ យើងខ្ញុំនឹងបង្ហាញអ្នកពីរឿងដែលអ្នកម្តាយគួរតែប្រយ័ត្នក្នុងពេលជិតដល់ខែ។ តើមានអ្វីខ្លះទៅ?

1# នៅពេលដែលអ្នកពរពោះបាន៧ខែ អ្នកគួរតែរៀបចំសម្លៀកបំពាក់កូន និងរបស់របស់ប្រើប្រាស់ផ្សេងៗឲ្យហើយ ព្រោះបើជិតដល់ខែ ទើបអ្នករៀបចំ នឹងធ្វើឲ្យអ្នកមិនអាចរៀបបានគ្រប់ចំនួនឡើយ។

2# នៅពេលដែលអ្នកជិតដល់ខែសម្រាល អ្នកគួរតែគេងបែរមកចំហៀងខាងឆ្វេង ហើយជើងដែលជិតគ្រែគួរតែដាក់រាងកោង ទើបអ្នកអាចគេងដោយមានអារម្មណ៍សុវត្ថិភាព។ ជាពិសេស បើអ្នកកើតមានអាការៈហើមជើង អ្នកគួរតែទ្រខ្នើយមួយពីក្រោមជើង ទើបអាចបំបាត់អាការៈនេះបាន។

3# នៅពេលដែលអ្នកជិតដល់ខែ អ្នកនឹងកើតមានអារម្មណ៍មួយដោយឈឺពោះតិចៗ ហើយស្បូនអ្នកចាប់ផ្តើមបើកក្នុងពេលយប់ ប៉ុន្តែក្រោយពេលដែលសម្រាកលើគ្រែ នឹងចាប់ផ្តើមធូលស្បើយវិញ។ បើអ្នកមានអារម្មណ៍ថាឈឺពោះយូរ អ្នកគួរតែទៅមន្ទីរពេទ្យជាបន្ទាន់ ទើបអាចចៀសពីគ្រោះថ្នាក់។

4# នៅពេលដែលអ្នកកើតអាការៈរាករូស អ្នកគួរតែទៅមន្ទីរពេទ្យជាបន្ទាន់ ព្រោះបើទុកយូរ អាចធ្វើឲ្យអ្នកទាំងពីរប្រឈមមុខនឹងគ្រោះថ្នាក់ខ្លាំងណាស់។ ដូចនេះ អ្នកគួរតែប្រយ័ត្នឲ្យបានខ្ពស់ក្នុងពេលដែលជិតដល់ខែកើត៕

អ្នកម៉ាកឈឺពោះជិតសម្រាល! គួរតែអនុវត្ត៧ចំណុចនេះ

នៅមុនពេលដែលជិតសម្រាលកូន អ្នកម្តាយគ្រប់គ្នាសុទ្ធតែមានអាការៈឈឺពោះ គ្រាន់តែអ្នកខ្លះឈឺតិច ឯអ្នកខ្លះឈឺខ្លាំង ដូចនេះតើមានវិធីអ្វីសម្រាប់ទប់ទល់នឹងអាការៈនេះទៅ?

1# នៅពេលដែលអ្នកឈឺពោះ អ្នកអាចគេងមួយចំហៀងខ្លួន រួចផ្តោតអារម្មណ៍ទៅលើការដកដង្ហើម នោះវាអាចជួយអ្នកកាត់បន្ថយអាការៈឈឺបាន ដោយអ្នកត្រូវដកដង្ហើមឱ្យវែង ប្រសិនជាឈឺខ្លាំង អ្នកអាចដកឱ្យលឿនបាន តែបើរាងធូរបន្តិច អ្នកអាចដកដង្ហើមយឺតៗវិញ។

2# ក្រោយពេលដែលអ្នកឈឺរួច អ្នកអាចចុះពីលើគ្រែដើរដើម្បីឱ្យទារកធ្លាក់ចុះមកក្រោមបាន ប៉ុន្តែត្រូវតែមានសមាជិកគ្រួសារកំដរ។

3# អ្នកក៏អាចប្រើទឹកកកមកស្អំនៅក្រោយខ្នងអ្នកត្រង់កន្លែងរាងក្រោមដែរ ព្រោះវាអាចជួយឱ្យអាការៈនេះរាងធូរស្រាលបន្តិច។

4# នៅពេលដែលស្ត្រីមានផ្ទៃពោះឈឺពោះ អ្នកអាចយកខ្នើយ ភួយ ឬរបស់ដែលទន់ៗ យកមកឱ្យស្ត្រីមានផ្ទៃពោះកាន់បាន នោះគេនឹងមានអារម្មណ៍សុវត្ថិភាព ហើយអាចគ្រប់គ្រងអារម្មណ៍របស់ខ្លួនបានបន្តិច។

5# អ្នកអាចដើរហាត់ប្រាណបាន ព្រោះពេលដែលអ្នកដើរ វាអាចជួយកាត់បន្ថយអាការៈឈឺចុកចាប់បានខ្លះ។

6# អ្នកក៏អាចប្រើទឹកក្តៅសម្រាប់ងូតទឹកបានដែរ ព្រោះទឹកក្តៅអាចជួយអ្នកឱ្យបន្ធូរអារម្មណ៍បាន និងជួយម៉ាស្សាអ្នកបានទៀតផង ដូចនេះវាក៏អាចជួយបំបាត់អាការៈឈឺចុកចាប់របស់អ្នកបានដូចគ្នា នោះអ្នកនឹងមិនសូវឈឺឡើយ។

7# អ្នកអាចឱ្យស្វាមីអ្នកជួយម៉ាស្សាជើង និងដៃរបស់អ្នកបាន ព្រោះវាអាចបង្វែរអារម្មណ៍អ្នកពីការឈឺចុកចាប់របស់អ្នកមកលើការម៉ាស្សា៕