ការធ្វើលំហាត់ប្រាណ! ក្រោយសម្រាលកូនហើយ ម៉ាក់ៗគួរដឹងពីអត្ថប្រយោជន៍ទាំងនេះ

បន្ទាប់ពីមានផ្ទៃពោះអស់រយៈពេល៩ខែ អ្នកម្តាយជាច្រើនតែមានការព្រួយបារម្ភចំពោះបញ្ហាឡើងទម្ងន់ និងបញ្ហាសុខភាពផ្សេងៗខ្លាចមិនអាចត្រលប់ដូចដើមវិញបាន។ ដោយសារតែមូលហេតុនេះហើយ ទើបអ្នកម្តាយភាគច្រើនតែងទម្លាប់ធ្វើលំហាត់ប្រាណ បន្ទាប់ពីសម្រាលកូនហើយ។

តើការធ្វើលំហាត់ប្រាណបន្ទាប់ពីសម្រាលកូនរួច ផ្តល់ប្រយោជន៍អ្វីខ្លះសម្រាប់អ្នកម្តាយ? ខាងក្រោមនេះ គឺជាចម្លើយដែលស្ត្រីគ្រប់គ្នាចង់ដឹង៖

លើកកម្ពស់ដល់ការសម្រកទម្ងន់ ជាពិសេសប្រសិនបើអ្នកទម្លាប់ទទួលទានអាហារដែលមានកាឡូរីទាប

បង្កើនភាពរឹងមាំនៃសរសៃឈាមបេះដូង

ពង្រឹង និងរឹតបន្តឹងសាច់ដុំក្បាលពោះឲ្យរាបស្មើ

បង្កើនកម្រិតថាមពល

បំបាត់ភាពតានតឹង

លើកកម្ពស់ការគេងឲ្យមានភាពប្រសើរឡើង

តែទោះជាយ៉ាងណាមុនពេលអ្នកចង់ធ្វើអ្វីមួយអ្នកគួរតែពិគ្រោះជាមួយគ្រូពេទ្យជាមុនសិន ដើម្បីធានាថាអ្វីៗគ្រប់យ៉ាងមានសុវត្ថិភាព ជាពិសេសស្ត្រីដែលសម្រាលកូនដោយវិធីវះកាត់៕

អាហាបំប៉នទាំង៣ប្រភេទ! ជម្រុញការលូតកម្ពស់កុមារ

តើអ្នកចូលចិត្តបង្ខំឲ្យកូនញ៉ាំអាហារផ្សេងៗ ដូចជាទឹកដោះគោះ ដើម្បីឲ្យកូនឆាប់លូតកម្ពស់បានល្អមែនទេ? ការពឹងផ្អែកទៅលើទឹកដោះគោ តែមួយមុខគត់ មិនអាចផ្តល់សារធាតុចិញ្ចឹមគ្រប់គ្រាន់ដល់កុមារនោះទេ។ នេះហើយជាមូលហេតុដែលអ្នកជំនាញបានផ្តល់ដំបូលន្មានឲ្យឪពុកម្តាយគ្រប់រូប ព្យាយាមបន្ថែមអាហារដែលសម្បូរសារធាតុចិញ្ចឹមចម្រុះដល់កុមារឲ្យបានច្រើន។

យកល្អ ដើម្បីជំរុញដល់ការលូតកម្ពស់ និងរក្សាឆ្អឹងកូនឲ្យកាន់តែរឹងមាំ ក្រៅពីផ្តល់ទឹកដោះគោឲ្យកូន ១ទៅ ២កែវក្នុងមួយថ្ងៃ អ្នកត្រូវផ្តល់អាហារមួយចំនួនទៀត។

របបអាហារដែលអ្នកគួរតែផ្តល់ឲ្យកូនត្រូវតែមានផ្ទុកសារធាតុចិញ្ចឹម ៤យ៉ាង គឺប្រូតេអ៊ីន ជាតិខ្លាញ់ វីតាមីន និងសារធាតុរ៉ែ។

1# ប្រូតេអ៊ីន៖ អាហារដែលសម្បូរប្រូតេអ៊ីនមាននៅក្នុង សាច់ត្រី បង្គា ក្តាម អន្ទង់ សណ្តែកសៀង… ។

2# ខ្លាញ់៖ ពពួកអាហារដែលសម្បូរខ្លាញ់ ត្រូវបានគេរកឃើញនៅក្នុង ប៊ឺរ ត្រី គ្រាប់ធញ្ញជាតិ និងស៊ុត…។

3# វីតាមីន និងសារធាតុរ៉ែ៖ អ្នកត្រូវជ្រើសរើសអាហារដែលសម្បូរវីតាមីន ងាយរំលាយដូចជា វីតាមីន A និងវីតាមីន D។ លើសពីនេះ បន្លែពណ៌បៃតង និងផ្លែឈើ គឺជាប្រភពនៃវីតាមីន ព្រមទាំងសារធាតុរ៉ែ ដែលអាចជួយពង្រឹងដល់ឆ្អឹងកុមារឲ្យមានការលូតលាស់បានល្អ ហើយកាន់តែរឹងមាំ៕

ការអភិវឌ្ឍន៍ខួរក្បាល! របស់ទារកអាយុ៣ឆ្នាំដំបូង

ខួរក្បាលរបស់ទារកមានការរីកចម្រើនទៅតាមរយៈបទពិសោធន៍ដែលទទួលបានក្នុងអំឡុងពេលនៃការអភិវឌ្ឍន៍។ រយៈពេល៣ឆ្នាំដំបូងនៃជីវិត គឺជាដំណាក់កាលលូតលាស់មិនគួរឲ្យជឿនៅក្នុងគ្រប់វិស័យទាំងអស់នៃការអភិវឌ្ឍរបស់ទារក។

ខួរក្បាលទារកទើបនឹងកើត គឺមានទម្ងន់ប្រហែលជា ២៥ភាគរយប៉ុណ្ណោះនៃទម្ងន់ខួរក្បាលរបស់មនុស្សពេញវ័យ ប៉ុន្តែនៅអាយុ៣ឆ្នាំ វាបានរីកចម្រើនយ៉ាងខ្លាំង ដោយការផលិតកោសិការាប់លាន និងរាប់ពាន់លាននៃការផ្សារភ្ជាប់គ្នារវាងកោសិកាទាំងនេះ។

ក្នុងអំឡុងពេល៣ឆ្នាំដំបូង ខួរក្បាលរបស់ទារកមានទម្ងន់កើនឡើង៣ដង និងបង្កើតការតភ្ជាប់សរសៃប្រសាទប្រហែលជា ១,០០០លានឯណោះ។

ដូច្នេះក្នុងអំឡុងពេល៣ឆ្នាំដំបូងនេះ អាណាព្យាបាលទាំងឡាយគួរតែផ្តល់អាហារណាដែលជួយជំរុញដល់ការអភិវឌ្ឍន៍ខួរក្បាលទារក អោយបានច្រើន។ ម្យ៉ាងវិញទៀតក្នុងដំណាក់កាលនេះ កុំបង្រៀន ឬបង្ហាញកាយវិកាយមិនល្អឲ្យកូនឃើញឲ្យសោះ ព្រោះពួកគេអាចឆាប់ចាប់បាន ហើយមិនងាយកែឡើយ៕

អ្នកម៉ាក់កំពុងពពោះ! ទម្លាប់គេងផ្អៀងទៅខាងស្តាំ គ្រោះថ្នាក់ខ្លាំងណាស់

អ្នកជំនាញជាច្រើនបានណែនាំថា ការគេងមិនត្រឹមត្រូវអាចជះឥទ្ធិពលយ៉ាងខ្លាំងដល់សុខភាពរបស់ស្ត្រីមានផ្ទៃពោះ ជាពិសេសប្រសិនបើពួកគេមានទម្លាប់គេងផ្អៀងទៅស្តាំរហូត។

ទោះបីជាមនុស្សស្រីមួយចំនួនមិនអាចគ្រប់គ្រគ្រងទីតាំងនៃការគេងរបស់ខ្លួនឯងក៏ពិតមែន ប៉ុន្តែអ្នកជំនាញបានផ្តល់ដំបូលន្មានអោយស្ត្រីមានផ្ទៃពោះគួរជៀសវាងការគេងផ្អៀងទៅខាងស្តាំ។ ព្រោះវាអាចកាត់បន្ថយចរាចរណ៍ឈាមទៅកាន់ទារក ប៉ះពាល់ដល់សុក និងកាត់បន្ថយកម្រិតលំហូរនៃសារធាតិចិញ្ចឹមរបស់ទារក។

លើសពីនេះស្ត្រីមានផ្ទៃពោះអាចឡើងទម្ងន់ខ្លាំងជាងធម្មតា ហើយការគេងបែបនេះយូរទៅនឹងមានសម្ពាធដល់ថ្លើមថែមទៀត។ ដូចគ្នានេះផងដែរ ស្ត្រីអាចប្រឈមនឹងបញ្ហារលូតកូន ជាពិសេសនៅក្នុងត្រីមាសចុងក្រោយនៃការមានផ្ទៃពោះ។

ក្រៅពីស្ត្រីមានផ្ទៃពោះ សូម្បីតែមនុស្សទូទៅក៏គួរតែជៀសវាងការគេងបែបនេះដែរ ព្រោះវាអាចបង្កើនហានិភ័យក្រហាយទ្រូង ស្ពឹកដៃជើងនៅពេលក្រោកឡើង ចាល់ជាតិអាស៊ីតក្នុងក្រពះ មានផលអាក្រក់ដល់បំពង់អាហារ និងធ្វើឲ្យប្រភេទនៃជំងឺមហារីកមួយចំនួនវិវត្តឡើងផងដែរ៕

ជំងឺក្អកមាន់ និងវិធីការពារកុំអោយកើតមានលើទារក

ជំងឺក្អកមាន់ កើតឡើងដោយសារតែការឆ្លងមេរោគបាក់តេរីទៅក្នុងសួត និងផ្លូវដង្ហើម។ វាចាប់ផ្តើមចេញរោគសញ្ញាដូចជា ត្រជាក់ចុងច្រមុះ និងក្អកតិចៗ បន្ទាប់ពីរយៈពេលពីរសប្តាហ៍កន្លងផុតទៅការក្អកកាន់តែខ្លាំងឡើង។

ជារឿយៗ ការក្អកអាចធ្វើឲ្យផ្ទៃមុខរបស់ទារកមានសភាពក្រហម ហើយជួនកាលពិបាកក្នុងការដកដង្ហើមនៅចុងបញ្ចប់នៃការក្អក។ ការក្អក អាចមានរយៈពេលច្រើនសប្តាហ៍ ឬច្រើនខែ។ ដូច្នេះប្រការសំខាន់អ្នកត្រូវតាមដានការក្អកដែលកើតមានចំពោះទារក ព្រោះពួកគេប្រហែលជាមិនមានរោគសញ្ញាដូចគ្នានោះទេ ប៉ុន្តែរោគសញ្ញាមួយដែលដូចគ្នាគឺពិបាកដកដង្ហើម ហើយជួនកាលអាសស្ទះដកង្ហើមម្តង។

រយៈពេលដែលកើតមានអាការក្អកខ្លាំងៗនេះ គឺចន្លោះ៥ទៅ២១ថ្ងៃ តែរោគសញ្ញាដំបូងនៃការក្អកនឹងបង្ហាញក្រោយពេលការឆ្លងបានបីសប្តាហ៍។

ទោះជាយ៉ាងណាដំណាក់កាលឆ្លងនេះអាចត្រូវបានកាត់បន្ថយ ប្រសិនបើអ្នកទទួលទានថ្នាំអង់ទីប៊ីយោទិចរយៈពេល ៥ថ្ងៃ តាមវេជ្ជបញ្ជាគ្រូពេទ្យ។ វាពិតជាមានសារៈសំខាន់ណាស់ ប្រសិនបើអ្នកនាំកូនទៅមន្ទីរពេទ្យធ្វើរោគវិនិច្ឆ័យភ្លាមៗ ក្រោយពេលសង្ស័យថាមានជំងឺនេះ ដោយសារតែការឆ្លងខ្លាំងអាចប៉ះពាល់ទៅលើក្រុមមនុស្សមួយចំនួន ជាពិសេសទារកទើបនឹងកើត ឬទារកក្រោមអាយុ៦ខែ និងស្ត្រីមានផ្ទៃពោះ។

មេរោគនេះ អាចការពារបានតាមរយៈការចាក់វ៉ាក់សាំង និងកម្មវិធីចាក់វ៉ាក់សាំងជាប្រចាំសម្រាប់កុមារ រាប់បញ្ចូលទាំងការចាក់ថ្នាំបង្ការប្រឆាំងនឹងជំងឺក្អកមាន់នៅចន្លោះអាយុពីរ បី និងបួនខែ ហើយម្តងទៀតមុនពេលចូលរៀន។ សម្រាប់កម្មបច្ចុប្បន្ន ក៏បានរួមបញ្ចូលផងដែរ នូវការចាក់វ៉ាក់សាំងលើស្ត្រីមានផ្ទៃពោះចន្លោះពី ២៨ ទៅ ៣៨សប្តាហ៍ នៃការមានផ្ទៃពោះ ដើម្បីផ្តល់ការការពារបន្ថែមដល់កូនដែលទើបនឹងកើត៕

ដឹងអត់? ម៉ាក់ៗបំប៉ៅដោះកូន៦ខែដំបូង ទទួលបានអត្ថប្រយោជន៏ច្រើនណាស់

ជាទូទៅ អ្នកម្តាយគ្រប់រូប ត្រូវបានក្រុមគ្រូពេទ្យណែនាំអោយធ្វើការបំបៅដោះកូន តែមួយមុខគត់យ៉ាងតិចបំផុតរយៈពេល ៦ខែ ទើបផ្តល់អាចអាហារបំប៉នបន្ថែមផ្សេងៗបាន។ តើហេតុអ្វីត្រូវបំបៅកូនតែមួយមុខបែបនេះ? តាមពិតការបំបៅដោះកូន មិនត្រឹមតែមានប្រយោជន៍ដល់កូននោះទេ សូម្បីតែអ្នកម្តាយក៏ទទួលបានប្រយោជន៍ដូចគ្នាដែរ។

អត្ថប្រយោជន៍នៃការបំបៅទឹកដោះចំពោះទារក៖ ទឹកដោះម្តាយផ្តល់នូវអាហារបំប៉នដ៏ល្អបំផុតសម្រាប់ទារក រួមទាំងវីតាមីន ប្រូតេអ៊ីន ខ្លាញ់ល្អ និងអ្វីៗគ្រប់យ៉ាងដែលទារកអ្នកត្រូវការ។ ការបំបៅដោះកូនបានច្រើន អាចបង្កើនប្រព័ន្ធភាពស៊ាំ រក្សាទារកអោយជៀសផុតពីជំងឺធាត់ កាត់បន្ថយជំងឺទឹកនោមផ្អែម ខ្វះជាតិទឹក រាគ ទល់លាមក រលាកពោះវៀនធំ រលាកទងសួត ជំងឺបេះដូង និងជំងឺថ្លើម នៅពេលទារកធំពេញវ័យ។

អត្ថប្រយោជន៍នៃការបំបៅកូន ចំពោះម្តាយ៖ ការបំបៅដោះកូនដុតកាឡូរីបន្ថែម ដូច្នេះវាអាចជួយអ្នកក្នុងការសម្រកទម្ងន់បានលឿន។ វាអាចជួយបញ្ចេញអ័រម៉ូនអុកស៊ីតូស៊ីន ដែលជួយអោយស្បូនរបស់អ្នកឆាប់ត្រឡប់ទៅទំហំធម្មតាវិញ មុនពេលមានផ្ទៃពោះម្តងទៀត ហើយអាចកាត់បន្ថយការហូរឈាមស្បូនបន្ទាប់ពីកំណើត។ ការបំបៅកូនដោយទឹកដោះម្តាយក៏អាចកាត់បន្ថយហានិភ័យនៃជំងឺមហារីកសុដន់ មហារីកក្រពេញអូវែ ជំងឺពុកឆ្អឹង ជំងឺទឹកនោមផ្អែម…។

ដូច្នេះ ការចិញ្ចឹមកូនដោយទឹកដោះ មិនត្រឹមតែជួយអោយទារកលូតលាស់បានល្អនោះទេ វាក៏អាចធានាដល់សុខភាពចំពោះអ្នកម្តាយផងដែរ។ ម្យ៉ាងវិញទៀត ដើម្បីធ្វើអោយសុដន់ផលិតទឹកដោះបានច្រើន សម្រាប់ផ្គត់ផ្គងទារក អ្នកម្តាយត្រូវសុំយោបល់ពីក្រុមគ្រូពេទ្យអំពីរបបអាហារដែលត្រូវទទួលទាន៕

ពេលមានគភ៌! អ្នកម៉ាក់មិនអាចផឹកភេសជ្ជះទាំង៣នេះទេ

ការបំពេញសារធាតុរាវ បានគ្រប់គ្រាន់ គឺជារឿងដ៏ចាំបាច់ខ្លាំងបំផុតសម្រាប់ស្ត្រីមានគភ៌គ្រប់រូប ព្រោះវាអាចជួយបង្កើនភាពស៊ាំអោយកាន់តែមានភាពរឹងមាំ។ ទោះជាយ៉ាងណា មានភេសជ្ជ:មួយចំនួនស្ត្រីពុំគួរទទួលទាននោះឡើយ ព្រោះវាអាចបណ្តោលអោយអវិជ្ជមានដល់សុខភាពទាំងម្តាយ និងកូន។

ខាងក្រោមនេះ គឺជាដំបូលន្មានមួយចំនួន ដែលអ្នកជំនាញផ្នែកអាហារូបត្ថម្ភបានណែនាំអោយស្ត្រីមានគភ៌គួរឈប់ទទួលទានបណ្តោះអាសន្ន៖

1#ភេសជ្ជ:មានជាតិកាហ្វេអ៊ីន

មនុស្សគ្រប់រូបតែងតែចូលចិត្តទទួលទានកាហ្វេ ស្រា ស្រាបៀរ តែ… ប៉ុន្តែស្ត្រីមានគភ៌គួរតែជៀសវាង ព្រោះជាតិកាហ្វេអ៊ីននៅក្នុងភេសជ្ជ:ទាំងនេះអាចស្រូបចូលយ៉ាងលឿនទៅកាន់ទារកតាមរយ:ទងសុខ ដែលអាចបង្កអោយកើតមានបញ្ហាផ្សេង។

បើយោងតាមការពិសោធន៍របស់អ្នកជំនាញបានរកឃើញថា ជាតិកាហ្វេអ៊ីន អាចបណ្តោលអោយយខូចខាតសរីរាង្គមួយចំនួនរបស់ទារក ដូចជា ជើង ឆ្អឹងកង ឆ្អឹងថ្គាម ខូចភ្នែក ឆ្អឹងលូតលាស់មិនល្អ និងទារកើតមកលូតលាស់មានភាពយឺតយ៉ាវ…ជាដើម។

2#ភេសជ្ជ:មានជាតិកាបូនណាត

ភេសជ្ជ:ដែលមានផ្ទុកជាតិកាបូនណាត អាចប៉ះពាល់ដល់ការស្រូបយកជាតិដែករបស់រាងកាយ ហេតុនេះហើយ ប្រសិនបើស្ត្រីមានផ្ទៃពោះទទួលទានច្រើនពេក អាចបាត់បង់ជាតិដែកកាន់តែច្រើន ដែលបណ្តោលឲ្យកើតជំងឺខ្វះឈាមក្រហម។

3#ភេសជ្ជ:ត្រជាក់ៗ

ការទទួលទានភេសជ្ជ:ត្រជាក់ៗ អាចបណ្តោលអោយមានបញ្ហាក្រពះពោះវៀន រាងកាយមានភាពស្លេកស្លាំង ឈឺពោះ ហើមពោះ ពិបាកក្នុងការរំលាយអាហារ។ ភាពត្រជាក់ខ្លាំងពេក ក៏អាចរំញោចដល់ទារកក្នុងស្បូន ដែលធ្វើទារកមិនមានសុវត្ថិភាពផងដែរ៕

របបអាហារដ៏ត្រឹមត្រូវ! សម្រាប់អ្នកម៉ាក់កំពុងពពោះ

ការញ៉ាំ និងផឹកភេសជ្ជៈអំឡុងពេលមានផ្ទៃពោះ នឹងជួយអោយអ្នកទទួលបាននូវតុល្យភាពនៃសារធាតុចិញ្ចឹមសម្រាប់ទារកដែលកំពុងតែលូតលាស់ និងសម្រាប់រាងកាយរបស់អ្នកម្តាយផងដែរ។ ដូច្នេះការញាំចំណីអាហារមានតុល្យភាពដូចជាបន្លែ ផ្លែឈើ អាហារមានផ្ទុកជាតិម្សៅ ប្រូតេអ៊ីន និងទឹកដោះគោ គឺជារឿងមួយដែលអ្នកគួរព្យាយាមធ្វើនៅពេលមានផ្ទៃពោះ។

អ្នកគួរបំពេញបន្ថែមរបបអាហារជាមួយនឹងថ្នាំវីតាមីន D ដែលអាចជួយអោយដល់ការលូតលាស់នៃឆ្អឹង។

ការញ៉ាំចំណីដែលជាប្រភពដ៏ល្អនៃជាតិដែក នឹងជួយការពារពីភាពស្លេកស្លាំង ហើយអាហារទាំងនោះមានដូចជា សាច់មាន់ ស៊ុត គ្រាប់ធញ្ញជាតិ សណ្តែក អង្ករសំរូប នំប៉័ង ស្លឹកបន្លែពណ៌បៃតង និងផ្លែឈើស្ងួត ជាដើម។

ការញ៉ាំអាហារច្រើនអំឡុងពេលមានផ្ទៃពោះ នឹងធ្វើអោយអ្នកឡើងទម្ងន់ ប៉ុន្តែប្រសិនបើអ្នកគ្រប់គ្រងរបបអាហារបានល្អ និងធ្វើលំហាត់ប្រាណទៀងទាត់ អ្នកនឹងរក្សាទម្ងន់បន្ថែមជាមធ្យមប្រហែលជា ១១គីឡូងក្រាម៕

អ្នកម៉ាក់ពពោះខ្វះឈាម! គួរញាំអាហារទាំង២នេះ

ខាងក្រោមនេះ យើងខ្ញុំនឹងបង្ហាញអ្នកពីអាហារដែលស្ត្រីមានផ្ទៃពោះខ្វះឈាមគួរតែពិសារ ទើបល្អចំពោះសុខភាព។ តើមានអ្វីខ្លះទៅ?

1#នៅក្នុងសាច់គោសម្បូរទៅដោយសារធាតុចិញ្ចឹម និងអាចប៉ូវឈាមបាន។ ដូចនេះ បើអ្នកម្តាយខ្វះឈាម គួរតែបរិភោគ ទើបអាចជួយឲ្យឈាមមានគ្រប់វិញ មិនខ្វះទៀត។

2#ប្រសិនជាអ្នកខ្វះឈាមក្នុងកំឡុងពេលមានផ្ទៃពោះ អ្នកអាចញ៉ាំពុទ្ធ្រាក្រហមបាន ដោយមួយថ្ងៃអាចពិសារពី៣ទៅ៥គ្រាប់ ដើម្បីឲ្យឈាមដើរគ្រប់មកវិញ មិនងាយខ្វះទៀតឡើយ។ ដូចនេះ អ្នកម្តាយដែលពិនិត្យហើយឃើញមានអាការៈខ្វះឈាម គួរតែព្យាមបរិភោគអាហារពីរប្រភេទនេះ ដើម្បីឲ្យឈាមអ្នកគ្រប់វិញ។ ប៉ុន្តែអ្នកគួរតែឧស្សហ៍ពិនិត្យដូចគ្នា ព្រោះបើបរិភោគច្រើនពេក អាចនឹងលើសម្ពាធឈាមក៏ថាបានដែរ៕

ប្តីប្រពន្ធថ្មីថ្មោង! ចង់មានកូនកុំផឹកភេសជ្ជះទាំងនេះ ច្រើនពេក

ខាងក្រោមនេះ យើងខ្ញុំនឹងបង្ហាញអ្នកពីមូលហេតុដែលអ្នកមិនគួរពិសារភេសជ្ជៈកូកានៅពេលដែលអ្នកចង់មានផ្ទៃពោះ។ តើមានអ្វីខ្លះទៅ?

តាមការស្រាវជ្រាវមួយរបស់ប្រទេសអាមេរិកបានឲ្យដឹងថា ប្តីប្រពន្ធដែលទើបតែរៀបការថ្មីថ្មោង បើពិសារកូកា នឹងធ្វើឲ្យប៉ះពាល់ដល់សមត្ថភាពផលិតកូន ព្រោះសារធាតុដែលមានក្នុងកូកា អាចធ្វើឲ្យប៉ះពាល់ដល់ស្ពែម៉ាតូសូអ៊ីតរបស់បុរស។

នៅពេលដែលស្ពែម៉ាតូសូអ៊ីតដែលខូចនោះ ទៅប៉ះនឹងមេជីវិតញី ហើយកាច់សំបុកបង្កកំណើត នឹងធ្វើឲ្យកូននោះកើតមកមិនគ្រប់ជ្រុងជ្រោយឡើយ អាចប៉ះពាល់ដល់រូបរាងរបស់កូនបាន។ ជាពិសេស បើធ្ងន់ធ្ងរ អាចធ្វើឲ្យអ្នកទាំងពីរមិនងាយមានកូនក៏ថាបានដែរ។

ដូចនេះ ប្រសិនជាអ្នកចង់បានកូន អ្នកគួរតែកុំញ៉ាំកូកាឲ្យសោះ ទើបមិនប៉ះពាល់ដល់ការបង្កកំណើតរវាងអ្នកទាំងពីរ៕